Somi wonaano pullo

Somi wonaano pullo.

Mi waayda he haame.

Mi leloo he aññeere tawa mbiɗa fadi ndee hasboore.

Somi wonaano pullo.

Maa mi wonanno puuyɗo doondiiɗo tuuyooji ina yuppa he muuyooji.

Somi wonaano pullo.

Holko ngonannoomi?

Ngonannoomi ko wonde mo haɗi fotde.

Somi wonaano pullo.

Maa mi won mo wonde haɗi wonde.

Mi wona tawa mi wonaani he wonde.

Mi wona mo wonde haɗi wonde.

Gonɗo mo wonde haɗi ɗum wonde.

Somi wonaano pullo ?

Maa feere fof mi waɗ haa mi wona he nder wonde.

Somi wonaano pullo?

Mi surwa he surweende.

Somi surwii he surweende mi surwitoo he surweende.

Somi wonaano pullo?

Mi surwitoo he surweende.

Somi wonaano pullo?

Maa mi wiyi pulɗinɗo holko haɗi mi wonde pullo?

Haa mi heɗto jaabtawol pulɗinɗo pullo.

Pulaagu ko laawol nguurndam aadee.

Kuɗol Ngenndiyanke Joob

Ñalnde dewo 21 lewru Seeɗto

2023 

Lekkuule

En njettii ngenndi Seek siraaji Diine Seek Alh Muhammadu Saydu Alfaa Hammaat Bah Rta.

Madiina Gunaas.

Ngenndi keewndi lekkuule ñaamateeɗo: koyle jaaɓe jammuule, boyle, sumburbojel, duuɗe, barkeeje, ceene, bumme, dantakulaaje, kumbalukuttaaje, fof ndee ladde siŋkiraande.

Gure guurɗe ciŋkiraaɗe sunna aada diiwtaaɗe.

Simme cimmotooɗe he nder pittaaɗe.

Haa laaɓi nder mum diiwtaaɗo.

Ngenndi keewndi barke keewndi barooɗe laatiindi ngenndi fitiram golle.

Dadiiɗo dadii, dadiiɗo daɗtii haa dadi dadiiɗo.

Kamɓe fof ɓe ndenndi haa ɓe ndaɗtii dadiiɗo, ɓe ngonti moƴƴere hanndiiɓe.

Ceerno ko ciŋkoriiɗo diine haa wiyaa siraaji Diine.

Diine jaalii Madiina haa wiyaa wuro diine.

Ngenndiyanke Joob

Ñalnde dewo 21 lewru Seeɗto

2023

Njettooru Geno

Njettooru Geno 

En njettii Geno goodnuɗo kala goodal.

Ngal hono mum woodaani.

Ngaal goodal woni sabaabu kala goodaale.

En njettiimo kanko jiɗoowo waɗa baɗoowo laato.

Mo giɗgol mum alaa puɗfuɗe alaa goortorɗe.

Oon yiɗi waɗi, waɗi waɗi.

Kala ko waɗi waɗi.

Haa waɗi waɗi to waɗii waɗii.

En njuuli he makko kanko kowindiiɗo oon waɗi waɗi, haa ko waɗii waɗii.

Ngenndiyanke Joob

Ñalnde dewo 21 lewru Seeɗto 2023

AADI BIL-AADI

Ndee yimre yimaa ko ñalnde dewo 14 lewru Seeɗto hitaande 2023". » hakkunde pari he puwaasi. (Poissy)'', en ngonaano annoyinooɓe winndude ndee yimre, kono maataw ɗum joltu he men tan.

Maayde ko nde janfotoonde kural ko nde fiɗoore.

Teewu he nguru ko nde serndoore.

Mbuho ko nde ɓuucotoonde.

Ngaandi hoyre ko nde siiɓotoonde.

Nde haarna leydi nde ñammina giɗli.

Nde wilmaa nde willumaa.

He nder añɓe maa nde duñmaa nde duñtumaa.

Haa laakara nde fukkumaa.

He nder yiɗɓe maa nguurndam nde seerndu-maa.

So aduna ina jalna sahaaji heen ina woyna.

Mi ndaari dow mi ndaari les

Kammu oo toowi leydi ndii woɗɗitiima.

Mi sirŋiniima ndee maayde mi lumminiima haa tiiɗi mi jattiima.

Maayde wonaa jaasirgal nde wonaa daɗirgal.

So aduna ko wutte ina wayloo mbaydi mum neɗɗo ina janfoo.

Nanndin-maa he nannditooje.

Sara mbaydi maa sartoo mbaydi maa.

Willa gite he nanɗe noppi hanndoo.

Wayla jiyɗe nannditina-ɗe he dooɓe.

Aduna ɓasat kono heddotaako.

Aduna alaa jikke joganaa ko jikkeeji.

Padiraaɗo golle pinal he nder renndo, so en maayi en ngollaani ɗeen golle en kootdii he gacce.

Maa en lelo he nder gaññeere tawa eɗen ngondi he gacce.

Daranaade ndee aññeere moni kala ina waɗɗii.

Hol ko haɗi en wonde, haɗi en wonde ko en ngondaani he oo aadi.

Aadi bil-aadi, salaade aadi ɓuri firtude aadi.

Aadi wonaa tan kaaldigal e nanondiral.

Hakkunde maa he Geno ne ko aadi.

Ko aadi mo fotaani faaydeede he mahdii.

So ndi mahiima ne ko ndi toowndi.

Taaniraaɓe men kay pirtaani o aadi.

Maayde ina muusi kono laakara guurɗo ina woɗɗi.

Guurɗo aduna ina ñiiɓi kono laakara ina ɓadtii.

Yolleede he makka, moggeede he makka.

Guurnooɗo he mayri ina haari he mayri.

Leliiɗo he mayri ina haarnaɗi he mayri.

Tataaji toowɗi mahaaɗi he dow mayri.

Comci jooɗɗi ciŋkoraaɗi he dow mayri.

Kono haɗaani ma mudeede he nder mayri.

Woto njooɗnen oo aduna, kono njooɗnen jikkuuji men pawen-ɗi he jikkuuji annabi Allah.

Aadi bil-aadi salaade aadi ɓuri firtude aadi.

Ko o aadi min mbaɗdi he kuuɓmoowo aadi.

Jaɓɗo aadi mo firtata aadi he yeeso taganaaɗo oo aadi.

Mammadu Sammba Joob Murtuɗo firtaani oo aadi haa o lelii he aññeere omo fiɓi oo aadi.

Yoo Allah fiɓi oo aadi.

O fiɓana piɓɗo oo aadi.

Haa o leloo he aññeere tawa omo tami o aadi.

Kuɗol Ngenndiyanke Joob

Ñalnde dewo 14 lewru Seeɗto hitaande

Yimre Alh Makki Sal

Koolol ngenndi.

En mbiyaani ndufen ƴiiƴam.

Kono ndufen e maɓɓe ƴiiƴam.

Njarnenɓe mette piyen e maɓɓe looci gacce.

Nganndinen-ɓe ngenndi ndii ko ndenndaandi.

En mbiyaani Makki haa abada.

Kono mbiyɗen ko Senegaal haa abada.

Ko ndii ngenndi taaniraaɓe men ligganinoo.

Woto pirten oo aadi.

Aadi Makki he Senegaal ina heddii.

Makki mahii tataaji Senegaal fof o hanndii.

Makki mahtiima Senegaal jam o addii.

Boytorɗe duusooje aadee e nokkuuje he nder ngenndi o addii.

Taccinooje en tufɗe o addii.

kiilniiɗe ɓamtaare ngenndi so baɗlal mum omo faabi.

Nokkuuje pettirɗe fuku haa ngenndi ɓamtoo ɗuum fof omo saati.

Laabi lewaaɗi ɓosnooji yontaaji payɗi arde omo daranii.

Diwooje dow weeyo fof he nder ngenndi o addii.

Joorɗe deegooje he wertallo fof addii.

Kaɓanteeɗam duuɓi he kitaale ngenndiije dowrowe o addii.

Gaboo Nijeriyaa afrik di siid.

Ɗaam ndeelam feeñi he ngoo wertallo Makki addii. 

Ndeelam fuccitii Senegaal hanndii ɓamtaare he faggudu Makki ina joofi.

Mi araani limtude golle Makki.

Kono ngarmi ko siftinde en golle Makki.

Coɓoƴji mbiltii haa mbiifnii maamaaje mbiltii.

Yummaaje ceɓɓitinooɗe barke mbiltii.

Maamaaje he leydi puccitiima ɗe mbiltii haa ɗe mbiifnii.

So leydi ndii dillaani.

So kammu oo samminaaka.

Weeyo ngo higginɗinaani haa nannditi he laakara mo doofollo hakkille mum yottaaki.

Ngel waawaa en dillinde.

En kulaani maayde, en ndogaani conngooje.

Conngooje yoo conngu soko maa wood koɗe keddi.

Eɗen coppi cabbi hiwde baa ngesa.

Joom-ñaaƴo he ngenndi Senegaal alaa to Makki heddi.

Aañam siiwol wiyi Makki haa abada.

Guurɗo mo maayata ko ɗaccuɗo donaaɗe he nder ngenndi.

Farba Ngom he baɗlal ngenndi Senegaal alaa too heddi.

Ciloñ wuro soogi, Maatam mbiyi Makki.

Mbuur he Gunaas mbiyi Makki.

Fuuta he ɓunndu mbiyi Makki.

Nokku keelte, ƴumoowo ceɓooje hecco he kecci, fuladu seedti ndee moƴƴere Makki.

Seengoor won koo golli hay sinndo won koo heddi.

Abdu Juuf ne kay golli hayso won koo heddi.

Abdullaay Wadda addii baɗlal he nder ngenndi Senegaal kono won koo heddi.

Laamu aduna ko deggondiral barooɗe.

So daddooje ndaddoyii maa ɓurondir  baraaɗi.

Kuumeen he nder ndee ladde he ndunngu juumel.

Ndunngu juumel toɓii ilooji ngilii.

Coofi ngilii, ngilii he damal galle kuumeen.

Kuumeen ko pullo ɗalɗo mahnde nagge. 

Ko pullo juumaajo joom sayaande lobbere tawraaɗo nagge he nay ilo yaladi.

Makki yeñtini nagge he ɓure mum.

Yeñtini ndeelam ndeeliɗam he nder ndii ngenndi.

Yeñtini awo he mbaydi mum.

Janngo ndee manoore semmbinta, semmbina ɓiɗɓe ngenndi.

Toowna ɓure ɓurnaaɗe ngenndi.

Haa yaynoo Senegaal wallita ɓesngu leydi.

Tibaaji kunnditaama nayeeɓe mballitaama.

Sagataaɓe ndadtiima peeje he kanndorɗe ɓamtiima 

Pellitanii ndii ngenndi ndartiima.

Yoo maamaaje mbiltu.

Yoo gaggaaje mbiltu.

Yoo coɓoƴji ndarto maaynooɗe yoo mbiltu.

Fof he fof en dente yoo mbaɗ he ndii ngenndi peeje ballitooje en yoo ngaddu.

Yoo en njarlito nguurndam yoo en palkiso.

Ɓiɗɓe ngenndi yoo njeewtid kaalda ko waɗi ɓalal yoo nanondir, baɗlal he laamu yoo ngaddu.

Kisal he ndeenka ngenndi yoo ngaddu.

Gawoowo baɗlal yoo addu.

Gaynaako baɗlal makko ina sokla yoo addu.

Demoowo baɗlal yoo addu.

Laño miijooji ƴelitooji yoo dartin sibu koɗum baɗlal ngenndi yoo addu.

Lunndiyanke miijooji maa moƴƴi ina padaa haa galle laamorgo aɗa sabbaa.

Sarɗiyankooɓe feññinooɓe caɗeele renndoyankeeje baɗlal mon ina tijjaa yo on ngaddu.

Hujjikinantooɓe ɓiɗɓe ngenndi baɗlal mon ina sabbaa yo on ngaddu.

Makki siŋkii, ndii ngenndi o yooɗnii.

Ñalnde 13 lewru Seeɗto hitaande 2023 pari Jaagordu ngenndiiru leydi Senegaal baɗlal men ina fadi.

Njalten baɗlal men ngadden ina nafta.

Njalten jamyamaagal wutte mum yoo en ɓoorno baɗlal yoo en ngaddu.

Senegaal ina jogii asli he duttorɗe.

Mahnooɓe ndee mahnde mahiinde haa tiiɗi Senegaal feŋiinde.

Afrik fof yooɗa golle Makki.

Makki siŋki siŋkitii sañi sañcitii fof he ndii ngenndi baɗlal o addi.

Yoo Allah ñiiɓnu nguu laamu.

Lammitina nguu laamu.

Sabu barke ɓurɗo ɓurnaaɗo winndere.

Alh Makki Sal.

Kuɗol Ngenndiyanke Joob.

Ñalnde 12 lewru Seeɗto hitaande 2023

Poissy 78

Yimre Aññeere

Aññeere ko dooknde kala aadee.

Faddiinde kala teewu he nguru.

Moɗoore riŋkotoonde.

Siiɓotoonde ƴiiƴam.

Yaroore ƴiiƴam ɓuuctotoonde kala mbuha.

Aññeere he mayre ko en luttoore.

Mbeelu he mayre ko en famɗitooɓe ha abada ƴiye he nder mayre ko en ɓollitooɓe.

Laakara ina ɓadii.

Guurɗo ko nde tommbitiinde.

Ñalnde kala ruuhu ko nde yilliinde.

Nguurndam ha abada miijo firtiino.

Nguurndam ko seeɗa duuɓi e kitaale moggeede he makka ko a jebbiliiɗo.

Woto kulen maayde.

Kulen tooñde nder he boowal ngoɗɗitoɗen.

Ɓerɗe men to Allah tottitoɗen haa laaɓa Allah njaggitoɗen.

Ko Allah tan woni laamɗo njarlitoɗen.

Tiiɗe e leydi pukken.

Ɓerɗe men to Allah laɓɓinen.

Woto mo fuunti hoyre mum he ndee Sahre dunaare nde ngarɗen yuurnaade en ngaraani tabbitde.

Maayde woɗɗaani aadee he aduna ina ɓeydii wummbilaade.

Ngoppen sañnjaare ndeentoɗen.

En mbaajaama to Diine en nanii.

Seerenɓe tinndinii he noppi en keɗtiima.

So en ngumaaka ɓerɗe aljanna ina ɓadtii.

Allah ko moƴƴo ñalnde kala baɗlal omo totta.

Kuɗol Ngenndiyanke Joob

ñalnde dewo 11 lewru Siilto htnd 2022 njamndi 11:46

Nguurndam ɗemngal

Teskaade harbiyankaagal hannde wontii tewru; moni kala ina jogii ɓulirde mum e nder mayru ina ƴoogto kañum tan e mayru. Daranaade ɗemngal walla leñol wonaa huunde newiinde ! Ina famɗi hannde ɗo leƴƴi (leñƴi) goɗɗi pergittoo e ɗemngal pulaar. Kono pullo pergittooɗo e ɗemɗe janane ina heewi huuɓata. So en teskimaa leñol ngol ɗemngal jor-jokkewal ngal e nder Senegaal ɓe timmaani 20% kono hannde ngaal ɗemngal yaɓɓii ɗemɗe keddiiɗe ɗee fof ! Nde tawnoo Pulaar wiyi: baaba potnooɗo dawnude ɓiɗɓe mum, so wontii ko kanko wiyata leloɗen ha naange e hoyre ndawen so en ndeenaaki en pamɗat ko gollaa. Ko fotnooɓe daranaade ɗemngal pulaar ngal mbaringal ha ngal maayi mes, ko noon tan ɗesaten waawde wiyde

Laamu leydi Senegaal holko ɓeydi darnde mum e ɗemɗe ngenndiije ? Abdullaay Wadda hay koo waɗnoo ko mbiyaten ko Makki Sal ittii ɗum ha laaɓi ! Sibu potal ɗemɗe ngenndiije ko Abdullaay Wadda addunoo ɗum e nder leydi Senegaal, e ballal Tijjaani Aan e darnde mum e ayaawo ngenndiiwo leydi Senegaal (yurmeende Allah yoo won e makko). Hay sinndo wonaa kanko tan o renndunoo ndeen darnde heeriinde. En njiyi hoyreejo mawɗo leydi ndi hono Alh Makki Sal kala nde o haali Pulaar ko e nder nokkuuji ɗiɗi (2) maa o yehii Madiina Gunaas walla o yehii fuuta, ɗoo woni Pullo ɗo, o geddi ɗemngal makko e pinal makko. Alh Makki Sal o yawnoraa ɗum ndiwoowa leydi Senegaal e laaɗe joorɗe ɗe fof ɗemɗe ngenndiije keddiiɗe ɗe keɓaani heen fotde mum'en ! Ɗoo mbiɗa sikki wonii ñawannde nde fulɓe ina poti yuurnitaade sibu Pulaar wiyi: mo rufi ɓirannde maa ko o roŋku so wonaano ɗum ko ɓirateenge nge o warata ! En njiyi gila hoyreejo mawɗo leydi ndi laami, o jooɗi e jappeere nde ɗemɗe ngenndiije ɗe hay heen gootal heɓaani fotde mum teeŋti ngal men ngal ''(Pulaar)'' o riŋkiima ɗemɗe ngenndiije keddiiɗe ɗee ha laaɓi, o rokkii gootal fotde mum; keddiiɗe ɗee o ɗawi ɗum. 

Gila-Kitaale-teemedanɗe: en njiyi ko Pulaar golli e nder renndo mum; winndii defte gannde keeriiɗe, gannde dowrowe, haa pine e rimɗitinde pine jaɓɓanooɗe, walla mbiyen gujjanooɗe, Allah e winndiyankooɓe men ngartirii ɗeen pine e gannde toowɗe. Holno ngool leñol jaɓirta ɗemɗe ɗe ngonaa ɗemɗe dowrowe ngardata ina pirta ɗum, ɗuum wonaa ko ina aaɓno ! Dentaangal doosɗe tammbiiɗe ɓamtaare leydi Senegaal ekn'', fof en ko fulɓe jibinaaɓe fuuta ina nganndi holko woni saqqaaji (caɗeele) renndo fulɓe. 

Miijooji: yontii daɗɗude peeje darantooɗe renndo ngo ko abbitii e ɗemɗe ngenndiije ɗe, sibu ɗemngal jor-jokkewal ngal, ngal wonaa ɗemngal cuɓangal tan ina wonana senegaalnaaɓe ɗemngal ngenndiwal, gardinaangal ɗemɗe keddiiɗe ɗe. Yontii ndeen mojobere fulɓe huuɓtodinnde darantoonde ɗiin hujjaaji leñol ngol, sibu yontii ndeen darnde heeriinde. Darnde men enen fulɓe wiyooɓe ko ngenndiyankooɓe, woto haaɗ tan e winndungol walla daartugol, walla bayyingol kabaruuji e nder renndo. Pulaar wiyi: mooroowo woto haaɗ tan e moorde, so o gaynii yoo suumtu. 

Alh Makki Sal: ko goonga won koo golli e nder leydi ndi, kono kadi won ko o bonni; tawi wonaa tan o gollaani, alaa ko o bonnu. Sibu ɗemɗe ngenndiije keddiiɗe ɗee fof moɗtaama ndiŋkaama ! Laaɗe diwooje ɗee, e laaɗe joorɗe ɗee fof ɗemɗe ngenndiije ɗee yoo keɓ fotde mum'en ha timma hono no ɗemngal jor-jokkewal ngal ni. So tawii ɓe nganndii ɓe mbaawa waɗde ɗemɗe ɗee fof, yo ɓe ƴeew ɗemngal ɓurngal hettineede, walla ɗemɗe ɗiɗi ɓurɗe jogaade semmbe e ɓe ngardina ɗum. Walla nih so tawii fof roŋkaama ina hulaa woto jibinde koonguuji yo ɓe mbaɗ farayseere e anngeleere ekn'', tawde so ɗemɗe keddiiɗe ɗee mbaɗaama maa jibinde goɗɗum. Annduɓe nduttondirat e miijooji ngam yuurnitaade caɗeele gonɗe e nder renndo mum'en, walla taariindi mum'en. Ɗee ɗoo caɗeele noon ko teskaaɗe e laamu Alh Makki Sal no feewi sanne; caɗeele teppugol ɗemɗe ngenndiije, teppitde ɗemngal gootal haɗa ɗemɗe keddiiɗe ɗee fotde mum'en, ɗuum ko ko teskaa e laamu Makki Sal. Makki Sal yoo ittan fulɓe geɗal sibu nguu laamu ngu o woni ɗoo e mum ngu, ko fulɓe lammini-mo sibu yoga e senegaalnaaɓe cikkunoo so tawii mbeddanaaki mo karte mum'en o jooɗotaako e jappeere nde ! Kono mbiɗa sikki tan ɗuum wontiino koyɗol muumo. 

Pulaar Fulfulde: ko ɗemngal no ɗemɗe keddiiɗe ɗee. Walla mbiyen Pulaar ko ɗemngal ngenndiwal, ngal fotaani haɗeede fotde maggal sibu ko joom maggal en ndarni ngootaagu Senegaal'', walla ni mbiyen ngootaagu Afrik. Ɓinngel ñiiwa wiyetaake yoo soro nagge muyna ! Fulɓe ndennden e hare ɓamtaare Pulaar tawa ko goonga e goonga.

Kuɗol Ngenndiyanke Joob

Ñalnnde 4 lewru siilo hitaande 2022

Poissy (farayse)

Pinal afriknaaɓe

NEƊƊAAGU AADE:

Ñalnde mawbaare 12 lewru Duujal hitnd 2021

Neɗɗaagal aade timmata ko e yiɗde leñol mum e ɗemngal mum e pinal mum. Gannde tuubakooɓe toowɗe, tammbiiɗe kaña ɓsmtaare aade fawii ko e gannde toowɗe gimmoriiɗe afrik e jamaanu ɓooyɗo. Teskotoɗa to senngo pinal tuubakooɓe, e pine ɓaleeɓe afriknaaɓe; so en teskiima faggudu men wonaa wooturu; waɗi noon ko kamɓe tuubakooɓe ɓe, oon tuma orop alaano lekkuule ñaamateeɗe, hay sinndo ine woodno jiida eno hannde nih. Kamɓe oon tuma ɓe nguurno ko kulle ladde ekn. Nde tawnoo oon tuma ine heewno diƴƴe penndiiɗe (kaaƴe ndiyam penndiɗam) ɗuum saabotono so yehii ha naange fooyni ɓe njaltanno ngaan saanga ɓe ƴeewoya kulle ladde ɓe mbara ɗum ɓe ñaama. 

Fawaade, e oon tuma so tawii aɓe njalta ɓe keewaani yahdude e suddiiɓe maɓɓe. Teeŋti so tawii debbo jibinii, so tawii aɓe njaha waaño ekn ɓe njahdataa e suddiiɓe maɓɓe. E oon tuma tuubakooɓe ɓuri wuurde ko teewu, ine jeyaa e tawaangal maɓɓe ha e ñallunge hannde ɓe ɓuri waawde wuurde ko teewu e liɗɗi ekn. 

Ɓaleeɓe afriknaaɓe: yimɓe ɓurnooɓe wuurde ɓiɗɓe lekɗe teeŋti e kosam ekn. Nde tawnoo oon tuma afriknaaɓe ko joginooɓe naange kadi ko ɓe joginooɓe jawdi ndariindi. Oon tuma afriknaaɓe nguurdata ko e dental nde tawnoo renndo maɓɓe joganooki kulhuli heege saɗtunge. Ko ɗuum saabi rewɓe maɓɓe oon tuma kañum en kala to worɓe maɓɓe njehi aɓe  njahda e maɓɓe. Ɓaleeɓe ko joom'en gannde kono oon tuma ɓe ngalaano nokkuuje, walla ɗereeji to ɓe poti waawde winndude gannde maɓɓe toowɗe ɗe. Ko ɗuum saabino ngam hulde maa jamaanu o wayloyo ɓe mbaɗti winndude yoga e ɗeen gannde e kaaƴe ekn. ''(Kaaƴe ko kecce)'' 

Waɗde so en ngartii e pinal walla ganndal maa en paam afriknaaɓe ko joom'en pine e aadaaji timmuɗi. Misra woniino galle coñce; hay sinndo won e leƴƴi keewɗi konnooɗi toon, ine anndaa ɓaleeɓe ngonaani heen caggal; sibu won e taarikyankooɓe wiyɓe misra ɓaleeɓe mahiino ɗoon nokkuure huufnde pine maɓɓe e aadaaji maɓɓe; won e nate ɗe njiyata ɓooyɗe tawii ɗe mbaɗi ko nay walla bey baali, sahaaji nih njiyaa ko wayno pucci ekn, tawii ɗuum fof ko pine ɓaleeɓe. Njiyaa ɗeen nate ɓaleeɓe hoɗnooɓe misra ine ndogata ine mbaɗa daɗndoo dogdu, walla sahaaji aɓe ndiga aɓe mbanngoo nokkuuje maɓɓe ɗe, fof teskinta tan ɓaleeɓe ngonaano oon tuma joom'en ɓalli poppolli (ɓoli) ngonnoo, wonko ɓe tawruno maamiraaɓe maɓɓe''. E nder ɓaleeɓe afriknaaɓe fulɓe njeyaa ko e gerngal mooftungal coñce ɓaleeɓe e nder duunde afrik nde. Sibu so en teskiima pine ɓaleeɓe gonnooɗe misra ɓooyɗe gaadanteeje ɗe ha ñallunge hannde aɗe tawee e nder renndo fulɓe. Maa en mbaɗtoy winndannde joofotoonde ko abbitii e ɗuum so haaji ɗo Geno''. En ndowiratɗo ha sahaa goɗɗo so haaji ɗo Geno.

Kuɗol Ngenndiyanke Joob

Nulaaɗo Muhammadu SAW

Tiitoonde 

Yimre: Nulaaɗo Muhammadu SAW

Hannde mi jaara Geno toowɗo mo lesɗude woodata.

tagɗo kammu koode he ilɓooje mum.

Jamma he ñalawma ine mbeñ-weñcondira ngam tago mum.

Tagɗo leydi he potondiral wertaango mum.

Tagɗo diƴƴal ɗo feeñi tago aade mum.

Tagaa innaa aade ɗo feeñi he mbaydi mum.

Geno laaɓti golle ɗo tago humpitii ɗum.

Ɗo Aadama tagaa innaa Aadama tagooje ine nganndi ɗum.

Tagooje peeñdi ɗee heen njeddi ɗum.

So goongɗinde Allah he golle mum.

Arwannde he waɗtannde liɗɗi he jinneeji ine goongɗini ɗum.

Muusaa dokkaaɗo sawru ngam firawna yoo waajo ɗum.

Iisaa Nulaaɗo he yimɓe mum.

Ɓe palii ɓe palkisii ha ɓe palii nelal mum.

Ɓe njippini jeddi he koongu he nder renndo mum.

Holi njoɓdi janngo oon pawɗo annabi bonannde he dow mum ?

Allah ko mawɗo alaa mo yeddi ɗum, so wonaa ɓeen malkisaaɓe jeyngol janngo ine padi ɗum.

Ahmad ɓurnaaɗo tago fof ine anndi ɗum.

Muhammadu lolli haa innde jaali he mum.

Ginnaɗo ko adii tago, inɗe ndewi he mum.

Mo Diine he sunna jippii he mum.

Muhammadu baayo, baayiiɗo he Halimatu saadiyatu ha barke feeñi he mum.

Ñalnde mburaangu diccii barke he baraaji alaa ɗo heddii he binnde mum.

Njuulu koorka hajju, goongɗingol amin keddii.

Madiina, ñalnde Nulaaɗo yottii ngelooba jusii alaa ɗo jam heddii.

Bawɗi jam ndilli kelle ndiwi alaa ɗo o annoora heddii.

Abuu Usmaan Umaar Aliw fiyannde Diine ɓe pellii.

Muhammadu ɓiyii Abdullaahi.

Muhammadu ɓiyii Aminata.

Mo caalli he diƴƴe maaje ngoodiri sabu mum.

Mo kammu he leydi ngoodiri sabu mum.

Mo jamma he ñalawma ngoodiri sabu mum.

Alaa ko woodi so wonaa nde goodal feeñi he mum.

Kuɗol Ngenndiyanke Joob.

Rabat Madiina Gunaas

Ñalnde Aaɓnde 10 lewru duujal (mai) hitaande 2021